د لوړو زده کړو وزارت مالي او اداري معین د دغه وزارت د تضمین کیفیت او اعتبار ورکولو ریاست څخه د یاد معینیت اړوند ادارو لاسته راوړنې، ستونزې او ننګونې واورېدې.
د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي، په داسې حال کې چې اړوندو رئیسانو هم حضور درلود، د هېواد تحصیلي بنسټونو اړوند علمي، اداري او مالي برخو کې راټول شوی راپور په مفصل ډول وړاندې کړ.
د لوړو زده کړو وزارت مالي او اداري معین مولوي حافظ محمد حسیب د تضمین کیفیت او اعتبار ورکولو ریاست له هر اړخیز راپور څخه د مننې تر څنګ وویل چې د دې وزارت ټولې هڅې او فعالیتونه د هېواد د تحصیلي نظام ځواکمنتیا په موخه دي. هغه وویل چې ټولې ادارې مسؤلیت لري، تر څو یادې موخې ته د رسېدو لپاره هڅې وکړي.
دغه راز نوموړي اړوندو ریاستونو ته سپارښتنه وکړه چې د ننګونو او ستونزو په حل کې جدي کړنې تر سره کړي.
د یادونې وړ ده چې د تضمین کیفیت او اعتبار ورکولو ریاست تر دې مخکې د کارونو چټکتیا او ستونزو د حل په موخه د دغه وزارت له علمي او محصلانو معینیتونو سره هم خپل راپور شریک کړی و.
