د خصوصي تحصیلي بنسټونو د ستونزو د حل په موخه د لوړو زده کړو وزارت او خصوصي تحصیلي بنسټونو د ګډ کمیسیون ناسته ترسره شوه.
یاده ناسته د لوړو زده کړو وزارت د تضمین کیفیت او اعتبار ورکولو رئيس استاد شاکر وحيدي په مشرۍ د خصوصي تحصيلي بنسټونو د ستونزو د حل په موخه ترسره شوه، چې د لوړو زده کړو وزارت يو شمېر رئيسانو او د خصوصي تحصیلي بنسټونو استازو پکې ګډون کړی وو.
د ناستې په پیل کې د تضمین کیفیت او اعتبار ورکولو رئیس استاد شاکر وحیدي د یادو ناستو د ګټو او اهمیت په اړه خبرې وکړې او د خصوصي تحصیلي بنسټونو له استازو یې وغوښتل چې د بحث شویو موضوعاتو د تطبیق په برخه کې کار وکړي.
ورپسې د اجنډا له مخې د خصوصي تحصیلي بنسټونو د کانکور ازموینې د اخیستلو پر څرنګوالي، د خصوصي تحصیلي بنسټونو ترمنځ د محصلینو د تبدیلۍ، د استادانو د دایمي ګمارنې او ترفیع پر لایحې، د علمي ژورنالونو د جواز اخیستلو او یو لړ نورو موضوعاتو په اړه بحث وشو.
وروسته د خصوصي تحصیلي بنسټونو استازو خپلې غوښتنې او ستونزې د کمیسیون له رئیس سره شریکې کړې، چې د نوموړي له لوري ډاډ ورکړل شو، چې د دوی غوښتنې به د وزارت له رهبرۍ سره د حل په موخه شریکي کړي.
